Ní gá a lua go raibh riméad ar phobal na Gaeltachta is Meánscoil San Nioclás
fógraithe mar Sheaimpíní na Mumhan (faoi 16.5) san Iomáint agus sa Pheil i
mbliana agus i measc an lucht tacaíochta ar fad a thréaslaigh leo bhí duine de
bhunaitheoirí agus iar-phríomhoide Mheánscoil San Nioclás, Nioclás Mac
Craith Uasal. Thug sé cuireadh do chaptaein na foirne Shane Ó hÓgáin agus
Liam Gagea Ó Réagáin, do Jack Ó Lonáin agus Oisín Ó Ceallaigh cuairt a
thabhairt air. Thug Nioclás cur síos dóibh ar an mbaint mhór a bhí aige féin le
Cumann Lúthchleas Gael leis na cianta, ar bhonn áitiúil agus ar bhonn náisiúnta
agus thaispeáin sé dóibh na boinn ar fad a bhuaigh sé le linn a shaoil. I measc
na n-éachtaí a bhain Nioclás amach, d’imir sé i gCraobh Shóisear Phort Láirge
sa Pheil in 1941 & in 1945, i gCraobh Sóisear na Mumhan sa Pheil in 1948 agus
i gCraobh Sinsear Phort Láirge sa Pheil in 1963. Bhí sé ar Fhoireann Shóisear
Phort Láirge in 1944, 1951 agus in 1959 agus d’imir sé i gCorn Uí Fhaoláin sa
pheil in 1955, 1958 & 1960. Ba chaptaen é An Craitheach ar an bhfoireann a
bhuaigh Craobh Sigerson in Ollscoil Chorcaí sa bhliain 1946. Is cúis mhór
bhróid dó go raibh sé mar Chathaoirleach ar CLG na Rinne, CLG na Brice agus
CLG Phort Láirge comh maith le bheith ina Chathaoirleach ar Chomhairle na
Mumhan, Cumann Iomána na Mumhan agus Coiste na Gaeilge Pháirc an
Chrócaigh. Is grianghraf stairiúil é seo ina bhfuil captaein ó ghlúinte éagsúla i
dteannta a chéile agus tréaslaímid a n-éachtaí spóirt leo ar fad. Gura fada buan
iad agus go mbeirimid beo ag an am seo arís. Míle buíochas ó chroí le hEibhlís
Ní Dhonnchadh agus le Ríoghnach Nic Craith as a gcabhair ar fad leis an
ngrianghraf.