Tá éachtaí móra spóirt bainte amach ag iománaithe agus peileadóirí na scoile le coicís anuas agus sárbhua deimhnithe ag an bhfoireann Iomána fé 16.5 in aghaidh Choláiste Fionnchua, Baile an Mhistéala. Ar shéideadh na feadóige deiridh bhí 2-20 ag Meánscoil San Nioclás in aghaidh 0-3 ag Coláiste Fionnchua. Tréaslaímid a gcuid éachtaí le gach duine den bhfoireann idir imreoirí agus bhainisteoirí díobh agus lena dtraenálaí Aonghus Ó Raghnaigh. Cúpla lá roimhe sin bhuaigh foireann camógaíochta na scoile in aghaidh Scoil Naomh Áine, Tiobraid Árann agus ba é an scór deiridh i bPáirc Uí Shíothcháin an lá sin ná Meánscoil San Nioclás 1-5 in aghaidh Scoil Naomh Áine 1-3. Ba é seo an chéad chluiche craoibhe a bhuaigh an scoil sa ghrád seo agus gach cúis ag imreoirí agus ag na traenálaithe Dearán Ó Droma agus Seán Ó Callanáin a bheith ag bóiceáil faoin éacht. Comhghairdeachas ó chroí le Foireann Peile na mBan faoi 16.5 as an mbua den scoth a bhí acusan in aghaidh Ardscoil na Mara i Páirc Uí Shiotcháin le déanaí agus le traenálaí na foirne Katie Ní Annáin atá tar éis an-obair a chur isteach chun peil na mban a chur chun cinn sa Mheánscoil le blianta beaga anuas. Ba é scór deiridh an chluiche ná 8-10 v 0-7. Go n-éirí go geal leo sa chluiche a bheidh acu ar an Trá Mhór an tseachtain seo in aghaidh fhoireann Ard Scoil na Mara arís. Níl a sárú ann.
