Déardaoin 7 Samhain chroch daltaí uile na Chéad Bhliana agus daltaí ceoil Bhliain 2 & 3 a seolta go Corcaigh chun éisteacht le ceolchoirm Cork Pops in Halla na Cathrach fad is a d’fhreastail daltaí eile Bhliain 2 & 3 ar Cheardlann mar chuid de Sheachtain na hEolaíochta, faoin athrú aeráide a bhí ar siúl in Halla an Bhaile, Dún Garbhán. Ar an lá ceannan céanna d’imir foireann na mbuachaillí (Sinsear) in aghaidh Scoil na mBráithre, Trá Lí i Ráth Luirc agus cé nach raibh an lá leo d’imir siad go cróga agus le spriod iontach foirne agus bhíomar an-bhródúil ar fad as gach aon duine díobh. Ár mbuíochas le Sinéad Ní Fhathaigh, Seán Ó Callanáin, Eoin Ó Murchadha, Colette Uí Ghealbháin, Ríonach Nic Craith agus Pádraig Ó Murchadha a d’eagraigh ócáidí éagsúla agus a thaistil le daltaí chuig na himeachtaí ar fad le linn na seachtaine.
Óga Yoga
Táimid ar fad ag coinne leis an tseachtain seo chugainn nuair a bheidh Ciarán Mac Fheargusa ó Óga Yoga ag teacht chun na Meánscoile chun yoga trí Ghaeilge a chur ar siúl do dhaltaí na hIdirbhliana agus beidh sé ag filleadh ar an scoil arís i mí na Nollag chun seans a thabhairt do dhaltaí eile na scoile tabhairt faoin Yoga. Tá clú agus cáil nach beag bainte amach ag Ciarán as a chuid ranganna yoga as Gaoluinn agus bíonn sé mar aoi bliantúil ag Oireachtas na Samhna.
Le teacht……
Tá go leor cluichí socraithe do Pheil na mBan agus don fhoireann Camógaíochta sna seachtainí atá romhainn amach agus beidh daltaí an Dara Bliain ag taisteal go dtí Ionad Eachtraíochta Chaisleán an Chomair, Co Chill Chainnigh chun tabhairt faoi Dhúshláin Foirne agus iad ag súil le Catapalt a thógaint is a scaoileadh suas sa spéir. Tá siad ag coinne go mór leis an turas agus leis an lá a chaitheamh ag obair as lámha a chéile. Go n-éirí go geal leo.